Die Botschoft
Da Erzengl Gabriel hot daumols auf d´ Nocht
da Jungfrau Maria die Botschoft mitbrocht,
du wirst, hot er gsogt und ih tua gwiss net lüagn
recht bold a kloans Kinderl, a Buzale kriagn.
Do frogt die Maria wia soll denn des gschehgn,
ih haun jo koan Maunn, host du des net gsehgn?
do sogt drauf da Engl, hiatzt hör ma guat zua,
vom Herrgott kriagst´s Kindl und des is a Bua.
Do moant hiatzt des Madl und mocht an kloan Knix,
waunn´s da Herrgoutt sou wüll, do hilft olles nix,
nur host´n du gfrogt wos da Bua kriagt für´n Naum?
„Na „Jesus“ natürlih, den gibt’s jo nou kaum.“
Drauf sogt die Maria, daunn solls holt sou sein,
Goutt Votta wird’s wissn, sou denk s´ insgeheim,
drum sogt sie zan Engl, hiatzt fliag wieder hoam
und gleih drauf woar ´s Madl daunn wieder alloan.
Do trifft sie an Josef, hot eahm d´ Hoamlichkeit klogt,
zerst woar er daschrouckn, dou daunn hot er gsogt,
ob heut ghörst za mir, loss dih hiatzt net alloan,
seit daumols is d´ Menschheit gwiss neahma valorn.
Aus dem Buch: Sou wia ma redn
Maria Schneider
Keine Kommentare:
Kommentar veröffentlichen