Bold is sou weit
Im Advent hobm die Menschn jo ollwal ´s Bestrebm,
dass die Arbeit im Houf und im Goartn is gschehgn,
waunn die Bam voller Frost und die Költn recht beißt,
wird’s im Haus drinnan ruihg, waht a aunderer Geist.
Bind die Muatta an Kraunz, steckt die Kirzn gleih drauf
und faungt aun bold zan Bochn die Kekserl zahauf,
riacht as Kletznbrot gleih drauf im Bockoufn drein,
do kaunn Weihnochtn ah neahma goar sou weit sein.
Wird as Kripperl vom Dochboudn hiatzt ah wieder ghult
richt da Groußvotta her, braucht dazua viel Geduld,
föhlt ban Jousef a Haund und a Schaferl ban Hirt
ruaft die Kinder dazua und daunn wird repariert.
Daunn am Halign Abnd, waunn die Arbeit is gmocht
wird a Bamal schön gschmückt, is jo wirklih a Procht,
untn drein liegn die Packerl, die Muatta talt s´ aus,
daunn kaunn´s Christkindl kemman für jedn im Haus.
Maria Schneider
Keine Kommentare:
Kommentar veröffentlichen